經POH轉介，一心以為早到TMH，會早些完成，只是，出乎意外，竟然比街市還熱鬧。佈滿人患，乜仲有咁多人咁早去急症睇症呀，好似去普通科睇診咁。......(我又大驚小怪左d)。

登記時，見到周圍玻璃貼滿睇急症輪候需時4小時，嘩!!!!!!!!!!!!!!!慘喇，實等到呆哂。巳經夠呆的我，更加呆。加上睡眠不足，又要實行禁食，可以想像我的樣子，有夠呆呆的。

登記後，例牌等叫名到分流站，護士先量血壓、查問病情、藥物的敏感、有乜唔舒服………然後又是等叫名，再上樓見急症醫生，見醫生，又再次查問病情，解釋照鏡，簽免責書，然後又去候診區等叫名......叫完名後，又要再上樓外科檢查，又要等叫名，等呀等呀等到花兒也謝了，照內規鏡過程10-20 鐘，卻用上n小時等候，終於等到自己的名字，又黎一次量血壓，跟住護士解釋︰麻醉藥、唔舒服、唔好吞口水...咬野.......由得口水流出來………

正式開始內規鏡檢查，血壓箍在手上，口帶左防咬斷器材膠，不知是醫生的粗魯還是本身反應過烈，一路照時，一路起飛腳，係咁掙扎，途中夾雜著依依呀呀的叫聲，就如受到滿清十大酷刑，被迫去忍受，眼水鼻水口水一齊流，好痛苦呀，護士們都要和我鬥力，終於明白怎會有兩個護士在病房。痛苦過後，經醫生檢查，找不到魚骨，沒有什麼疑物在口腔內，一聽只是這樣，難道是食詐糊????

然後又是等叫名，醫護人員帶路落樓到候診見醫生，護士再次為我量血壓，然後等醫生叫名，睇醫生，說明情況後，說明找不到魚骨，不是啃親，只見喉嚨很紅，有機會因為甲狀腺發大，加上淋巴發炎，會感覺到比針拮到，所以誤認為啃親，叫我小心d食野、唔好食太刺激性食物。

第一次感受到急症的外科和普通的外科分別。急症的外科(照鏡)，一組組去檢查的，即係全組人等組員，全部組員檢查完後才會一齊上樓、落樓。好似小學生咁，排隊上樓的鴨仔隊。最後見醫生前才會解散。反觀普通科的外科，都是登記後，等叫名，然後一take過，一次過逐步做哂，然後聽醫生講解就可以離開了。不計排期，檢查需時比急症還要快，但計排期，自然沒法比喇。

由8點到達直至12點離開，足足在醫院逗留4小時。由前一夜11點禁食直到12點，令我想起實行饑饉30的活動，捱餓，在呆等期間，肚餓的感覺引起胃痛發作了。可惜，還是要等..........但給了預警給我︰我的胃不再健康了。

中途發生小插曲，老細致電給我時，我發了脾氣，結果由老細的老細查問我的病情。我才知我去睇急症，在公司引起迴響了。

最後，寫email給老細致歉，沒多久，老細寫mail建議我調假，因怕我病情不能一人勝任工作，希望我在家休息多一些，希望我考慮……。但都比我拒絕了，照返更表如常地返工就可以了。